संसदीय सुनुवाइ समिति (संयुक्त) - बैठक ८

समितिको आजको बैठक समितिका सभापति माननीय बोध नारायण श्रेष्ठको सभापतित्वमा बस्यो। बैठकमा माननीय सदस्यहरुको उपस्थिति र निर्णय देहाय बमोजिम रहेको छ।

निर्वाचन आयोगका प्रमुख निर्वाचन आयुक्तको पदमा नियुक्तिका लागि प्रस्तावित श्री मान बहादुर कार्की, मोरङ्ग र निर्वाचन आयुक्तको पदमा नियुक्तिका लागि प्रस्तावित डा. राजीब सुब्बा, काठमाडौँ र श्री गुरू प्रसाद वाग्ले, ओखलढुङ्गाको सुनुवाइ प्रक्रिया अगाडि बढाउने।

(१) संवैधानिक परिषद्‍को मिति २०८३/०३/१९ को बैठकबाट प्रमुख निर्वाचन आयुक्त पदमा नियुक्तिका लागि श्री मान बहादुर कार्की, मोरङ र निर्वाचन आयुक्तको पदमा नियुक्तिका लागि डा. राजीब सुब्बा, काठमाडौं एवम् श्री गुरु प्रसाद वाग्ले, ओखलढुङ्गाको नाम सिफारिस भई संसदीय सुनुवाइका लागि समितिमा प्राप्त हुन आएकोले प्रस्तावित व्यक्तिहरू उक्त पदका लागि अनुपयुक्त लागेमा स्पष्ट आधार एवं सबुत प्रमाणसहित शिष्ट र मर्यादित भाषामा सूचना प्रकाशित भएको मितिले १० (दश) दिनभित्र समितिमा सूचना वा उजुरी दिन सरकारी सञ्‍चार माध्यम र सङ्‍घीय संसद् सचिवालयको विद्युतीय सञ्‍चारका माध्यमबाट समेत सूचना प्रकाशित गर्ने निर्णय गरियो।

(२) समितिको अर्को बैठक मिति २०८३ साउन ५ गते ४ बजे बस्नेगरी आजको बैठक स्थगित भयो।